Жорий йилнинг 7 январ куни Вазирлар Маҳкамаси “Солиқ хавфини бошқариш, солиқ хавфи мавжуд солиқ тўловчиларни (солиқ агентларини) аниқлаш ва солиқ текширувларини ташкил этиш ва ўтказиш тўғрисида” қарор қабул қилди.
ДСҚ матбуот хизмати хабарига кўра, солиқ текширувларига оид низомлар тасдиқланди, Ўзбекистон ҳукуматининг айрим қарорларига ўзгартириш ва қўшимчалар киритилди.
Хусусан, “Солиқ хавфини бошқариш, солиқ хавфи мавжуд солиқ тўловчиларни (солиқ агентларини) аниқлаш ва уларни солиқ хавфи даражаси бўйича тоифалаш тартиби тўғрисида”ги низом тасдиқланди.
Қарор билан тасдиқланган “Солиқ текширувларини ташкил этиш ва ўтказиш тартиби тўғрисида”ги низомда солиқ текширувлари турлари ва уларнинг хусусиятлари батафсил тушунтирилиб, солиқ органларининг мансабдор шахслари, солиқ тўловчилар ва вакилларининг ҳуқуқ ва мажбуриятлари белгилаб қўйилди.
Бунгача ушбу текширувларни ўтказиш тўғрисидаги низом Давлат солиқ қўмитаси буйруғи билан тасдиқланган эди. Энди текширувларни ўтказиш тартиби идоравий ҳужжат сифатида эмас, балки ҳукумат қарори сифатида қабул қилинди, яъни Вазирлар Маҳкамаси томонидан тасдиқланди.
Низомда қуйидаги солиқ текширувларини ташкил этиш ва ўтказиш тартиблари аниқ белгилаб берилган:
- камерал солиқ текшируви;
- сайёр солиқ текшируви;
- солиқ аудити.
Президент ташаббуси билан тадбиркорлик субъектлари фаолияти текширувларига эълон қилинган мораторий 2021 йилда ҳам амал қилади.
Солиқ хизмати органлари жисмоний шахслардан солиқ тўловчилар томонидан назорат-касса машиналари ёки тўлов терминалларидан фойдаланиш билан боғлиқ солиқ қонунчилиги бузилишига оид видеоёзувларни олганда, маҳсулотни назорат хариди орқали сотиб олиш талаб этилмайди.
Қарор билан киритилган ўзгартириш ва қўшимчаларга мувофиқ, чакана савдо билан шуғулланадиган юридик шахслар ва якка тартибдаги тадбиркорлар ўзларининг давлат рўйхатидан ўтказилганлиги тўғрисидаги маълумотларни, шу жумладан солиқ тўловчининг идентификация рақамини харидорлар танишишлари учун қулай жойларда жойлаштиришлари шарт.
Электрон ҳисобварақ-фактурага 2та янги устун қўшилди:
- товарларнинг (хизматларнинг) Ягона электрон миллий каталоги бўйича идентификация коди;
- товарлар (хизматлар) штрих-коди.
