Украина президенти коронавирусга қарши эмланди

Фото: Ukrainian Presidential Press Service / Reuters

Украина президенти Владимир Зеленский Оксфорд университети ва AstraZeneca компанияси коронавирусга қарши ишлаб чиққан Covishield вакцинаси билан эмланганини маълум қилди. Зеленскийнинг таъкидлашича, у бош қўмондон сифатида ҳарбийлар билан бирга эмланган.

Украина президенти 2020 йил ноябрда коронавирусни бошдан ўтказганди.

“Коронавирусга қарши эмландим. Буни бош қўмондон сифатида аскарларимиз билан бирга олд сафда амалга оширдим. Вакцина бизга яна чекловларсиз яшаш имконини беради”, деб ёзган Зеленский Twitter’да.

23 февралда Украинада Oxford/AstraZeneca вакцинаси рўйхатдан ўтказилган ва 24 февралдан у билан эмлаш бошланган. 2021 йил 1-2-чоракларида Украинага ушбу вакцинадан 2,2-3,7 млн доза етказилади.

Тайёрлаган: Шуҳрат Раҳимов

#вакцина #Володимир Зеленский