Озарбойжон ҳукумати мамлакатда коронавирус пандемияси сабабли киритилган алоҳида карантин режимини 1 июнгача узайтириш ҳақида қарор қабул қилди. Қарорга кўра, 31 майгача шанба ва якшанба кунлари жамоат транспорти ишламайди.
Аввалроқ карантин 1 апрелгача амал қилиши белгиланганди.
Шунингдек, Наврўз байрами нишонланиши вақтида республикада 20 мартдан 29 мартгача жамоат транспорти иши тўлиқ тўхтатилади.
Озарбойжонда 2020 йил 13 декабрда энг юқори кунлик касалланиш даражаси қайд қилингандан кейин 18 декабрдан касалланиш ҳолатлари сони камайиб борган, бироқ бир қатор чекловлар бекор қилинганидан кейин 2021 йил февралидан яна кўпая бошлаган. 18 март куни Озарбойжонда коронавируснинг британча штаммига чалиниш бўйича 3та ҳолат қайд қилингани маълум қилинди.
18 январдан мамлакатда аҳолини Хитойнинг Sinovac Biotech компаниясининг CoronaVac вакцинаси билан эмлаш бошланган. Республика раҳбарияти ушбу вакцинадан 4 млн доза сотиб олишга шартнома тузган. Охирги маълумотларга кўра, мамлакатда 500 мингдан кўпроқ киши ушбу вакцина билан эмланиб бўлган. Ўтган ҳафта республикада, шунингдек, Россиянинг “Спутник V” вакцинасини қўллашга рухсат берилган.
