Bloomberg: АҚШнинг Россиядан нефть импорти рекорд даражада ошиб кетган

АҚШ энергетика мустақиллигини қўлга киритган ва Европадаги иттифоқчиларини Москвага жуда қарам бўлиб қолишидан огоҳлантирган бўлса ҳам, Америка нефтни қайта ишлаш заводлари Россия нефтини ҳар қачонгидан кўпроқ сотиб олишмоқда.

Қўшма Штатларда Россия нефтига талабнинг ортиб бораётганлиги мамлакат энергетика дипломатиясига зиддир. Сабаби сўнгги икки йил давомида Вашингтон расмийлари Европа давлатларини «Шимолий Оқим 2» дан фойдаланиб, Сибир газини Германияга етказиб бериш учун миллиардлаб долларлик қувур линиясидан воз кечишга чақиришмоқда(Россия гази 2019 йилда Европа давлатлари табиий газ импортининг тахминан 45 фоизини ташкил этган).

Bloomberg таҳлилчилари ҳисоб-китобларига кўра, йиллар давомида АҚШ нефть ва қайта ишланган маҳсулотларнинг йиллик импорти 0,5 фоизини ташкил этган ҳолда, Россия сўнгги ўн йил ичида ўз улушини муттасил ошириб, ўтган йилда бу кўрсаткични 7 фоизга етказган. АҚШнинг Россиядан импорти 2020 йилда кунига ўртача 538 минг баррелни ташкил қилган. Таққослаш учун бу кўрсаткич Саудия Арабистонидан кунига ўртача 522 минг баррел атрофида бўлган.

Таҳлилларга кўра, Россиядан нефть экспорт қилишга бўлган талабнинг ошишига Николас Мадурога қўйилган санкциялар сабаб Венесуэладан нефть сотиб олишнинг кескин қисқариши бўлган. Бундан ташқари Саудия Арабистонидан экспорт ҳажмининг кескин камайиб кетиши натижасида АҚШ учун Россия энг арзон бозорга айланган.

Америкалик нефтни қайта ишлаш корхоналари Россиядан сотиб олган маҳсулот мазут ҳисобланиб, у асосан иссиқлик ҳосил қилиш учун фойдаланилади. Аммо бу маҳсулот АҚШда бензин ишлаб чиқариш учун ишлатилган.

Март ойида президент Байден Россия президенти Владимир Путинни «қотил» деб атади ва АҚШ сайловларига аралашгани учун ҳақ тўлашини таъкидлади. Агар Саудия Арабистони яқин бир неча ой ичида нефть ишлаб чиқаришни кўпайтирса, Оқ уй Россия нефтининг импортига қўйилган тақиқни ёзнинг охирида Россияга қўйилган санкциялар доирасида кўриб чиқиши мумкин.

Ўтган йилнинг биринчи ярмида Россиядан импорт қилинган маҳсулот 9,1 миллион тоннани ташкил этган. Бу кўрсаткич 2019 йилнинг мос даври билан таққослаганда 2,3 баробарга кўпдир.