Қашқадарёда ёшларга ажратилган ерни фермер тортиб олмоқчи бўлди

Қашқадарё вилояти Деҳқонобод туманида давлат дастурига кўра ёшларга ажратиб берилган ва улар томонидан турли экинлар экилган ерни шу туманда фаолият кўрсатаётган «Алмат арчаси» фермер хўжалиги раиси Илҳом Хўжақулов тортиб олмоқчи бўлган. У мазкур ер майдони кадастр агенлиги ходимларининг хатоси билан ёшларга янглиш тарқатилганини маълум қилган. Бу ҳақда туман ҳокимлиги ахборот хизмати хабар бермоқда.

Маълум қилинишича, Деҳқонобод туманидаги «Алмат арчаси» фермер хўжалигига тегишли 124-контурдаги 7 гектар ерни кадастр агентлигининг туман бўлими ходими англашилмовчилик билан Алмат қишлоғида яшовчи ёшларга 44 сотихдан ўлчаб берган. Ерга эгалик қилган ёшлар эса, мазкур ҳудудга экин эккан. Бундан хабар топган фермер ер ўзига тегишлилигини айтиб, ёшлардан ерни олиб қўймоқчи бўлган.

Бироқ, туман ҳокимлиги томонидан фермерга бу ерлар ёшлар бандлигини таъминлаш мақсадида уларга бир йиллик шартнома асосида берилгани, кадастр агентлиги ходими хатога йўл қўйгани тушунтирилган. Шундан сўнг, фермер ёшларни ҳосилини йиғиб олгунга қадар безовта қилмасликка ваъда берган. 

Аммо вазиятга ойдинлик киритган кадастр агентлиги туман бўлими бошлиғи Бахтиёр Саломов фермер айни кунгача фойдаланиб келган 134-контурдаги 10 гектар ер аслида туман захирасида бўлганини айтган. Унинг билдиришича, фермер туман захирасидаги ердан ўзбошимчалик билан фойдаланиб келган бўлиши ҳам мумкин.