Туркияда коронавирус тарқалиши билан боғлиқ мураккаб вазият туфайли шундай қарорга келинган.
Туркияда коронавирус тарқалиши кучайгани, 3 ҳафталик локдаун эълон қилингани муносабати билан Uzbekistan Airways Истанбулга аксарият авиарейсларни бекор қилди.
Транспорт вазирлигининг маълум қилишича, қуйидаги рейслар бекор қилинган:
- 2021 йил 14 май кунидаги HY 273-274 Тошкент – Истанбул – Тошкент рейси;
- 2021 йил 7, 10 ва 14 май кунларидаги Самарқанд – Истанбул – Самарқанд рейси;
- 2021 йил 1, 5, 8, 12, 15 май кунларидаги Фарғона – Истанбул – Фарғона рейси;
- 2021 йил 2, 9, 16 май кунларидаги Урганч – Истанбул – Урганч рейси.
Тошкент – Истанбул – Тошкент йўналишида кундузги HY 271-272 рейслар ўзгаришсиз бажарилади.
Туркияда 17 майгача тўлиқ локдаун жорий этилган. Чекловлар 29 апрел куни соат 19:00дан бошлаб кучга кирди ва 17 май куни 05:00да якунланади. Аммо тўлиқ локдаун хорижий сайёҳларга тааллуқли бўлмайди. Улар комендантлик соатига амал қилиш талабини бажаришдан озод қилинадилар.
Туркия Ички ишлар вазирлигининг ҳужжатида мамлакатга туризм мақсадида қисқа муддатга келган хорижий сайёҳлар локдаун вақтидаги комендантлик соатига риоя қилиш мажбуриятидан озод қилинишлари кўрсатилган. Шу билан бирга, Туркияда яшаш ҳуқуқига эга хорижликлар ёки вақтинча халқаро ҳимоя остида бўлганлар комендантлик соатига амал қилишлари керак бўлади.
Шу тариқа, сайёҳлар кўчага чиқишлари, жамоат транспортидан фойдаланишлари ва ўзлари турган меҳмонхонадан исталган узоқликдаги дўконларга ташриф буюришлари мумкин.
Мамлакатда тўлиқ локдаун киритилмагунча ҳам карантин чекловлари хорижий сайёҳларга нисбатан амал қилмаганди. Улар транспортда эркин ҳаракатланишган ва музейларга бора олишган.
