3 май куни Қизилтепа тумани ҳудудида 3 кишининг ўлими билан якун топган аянчли автоҳалокат содир бўлди. Бу ҳақда Kun.uz'га Навоий вилояти ИИБ ЙҲХБ ахборот хизмати раҳбари Фаррух Якубов хабар берди.
Маълум қилинишича, Когон-Қизилтепа йўналишида ҳаракатланиб келган «Tracker» машинаси туман ҳудудидан ўтган 4Р-63 автомобиль йўлининг 24-километрида юқори тезлик туфайли йўлдан чиқиб кетган.
Машинадаги йўловчилардан 2 нафари воқеа жойида, 1 нафари эса шифохонада вафот этган. Ҳозирда ҳолат юзасидан ҳайдовчига нисбатан жиноят иши қўзғатилиб, тергов ҳаракатлари олиб борилмоқда.
Аввалроқ Кармана туманида маст ҳолдаги 58 ёшли фуқарони «Matiz» машинаси уриб юборган, оқибатда у шифохонада вафот этганди.
