Ўсмир светофорда ҳам тўхтамаган: Қўқондаги мудҳиш автоҳалокат тафсилотлари

Қўқонда Malibu миниб, светофорнинг қизил чироғида ҳам тўхтамай юрган 9-синф ўқувчиси охир-оқибат 9 яшар уч болани уриб кетди. Улардан бири – Мина Каримий исмли қизалоқ вафот этди, тирик қолган дугоналари эса шифохонанинг реанимация бўлимида қолмоқда. Kun.uz мухбири воқеа жойида бўлиб, Минанинг яқинлари билан суҳбатлашди.

Мусибатлар ҳар хил бўлади... Офатлар, талафотлар, фалокатлар, қисқаси, кутилмган ҳолатлар. Аслида, кутилмаган эмас, бу ҳаммаси тақдир. Фақат бандаси учун кутилмаган бўлади.

Халқимизда “аввал келган аввал кетсин” деган бир гап бор. Тушунасиз-а бу гапнинг маъносини? Ёши катталар ўлимини енгилроқ ўтказиш, болалар вафотини эса оғир қабул қилиш инсон фитратида бор. Ҳеч кимни болам деб йиғлатмагин, деб дуо қилишарди қариялар, ва бунда олам ҳикмати бор. Фарзанд доғига чидаш осонмас...

9 яшар Мина Каримий онаси ва синглиси билан Қўқон шаҳридаги кўп қаватли уйлардан бирида шод-у ҳуррам яшаб келишаётган эди.

20 май куни тонг саҳарда унинг синглиси туш кўрди. Тушида опасининг оёғи синган, жаннатларда юрган эмиш. Туши ҳақида онасига айтиб ҳам берди...

Худди шу куни соат 15:45 лар чамаси. Мина Каримий тенгқурлари билан кўчада сайр қилиш учун онасидан рухсат сўради. Розилик олган қизалоқ дугоналари билан кўчага йўл олди. Кўп ўтмай, қизини ташқарига кузатиб, ўзи кир ювиб ўтирган она автомашинанинг асфалт йўлда узоқ сирпаниб қаттиқ тормоз босгани-ю ваҳимали гурсиллаган овозни эшитди.

Қоп-қора Malibu тўхтаган жойда тумонат одам тўпланган, йўл четида эса қизи Минанинг оёқ кийими ётарди. Муштипар она суриштира-суриштира қизини шифохонадан топди. Қизининг юзига оқ чойшаб ташланган эди...

Дугоналари билан пиёдалар йўлагидан ўтаётган Мина Каримийни яширинча уйдан машина ҳайдаб чиқиб кетган 9-синф ўқувчиси уриб юборган.

Мина Каримийнинг онаси ўзбек, отаси эса афғон эди. Отаси бу дунёни тарк этганда, у эндигина 4 ёшда бўлган. Отасининг тафтига тўймаган қизалоқ бор меҳрни онасидан олаётганди.

Афсуски, сингил кўрган туш ўнг бўлиб чиқди...

“Қизим тўрт ёшида отасидан айрилган эди. Минани ёлғизликда ўстираётган эдим. Энди қизим жаннатларга, отасининг ёнига кетди.

Кичик қизим ўша куни автоҳалокатни тушида кўрган экан. Туши ҳақида айтиб берган эди. Тушимда опамнинг оёғи синибди, жаннатларда юрган эмиш, деганида ҳайрон бўлгандим. Автоҳалокатда ростдан ҳам Минанинг оёғи синган эди.

Икки йил аввал уни Умрага олиб борган эдим. Ҳажга ҳам боришни ният қилиб қайтган эди”, дейди марҳума Мина Каримийнинг онаси.

Қўқон шаҳар шошилинч тиббий ёрдам шифохонаси нейрохирурги Алишер Умаровнинг айтишича, Мина билан бирга автоҳалокатга учраган икки қиздан бирининг аҳволи оғир, яна бириники эса барқарор.

Ҳолат юзасидан Қўқон шаҳар ИИБ тергов бўлими томонидан дастлабки суриштирув ишлари олиб борилмоқда. Отасининг машинасини ҳайдаб чиқиб, шаҳарнинг Амир Темур кўчасида автоҳалокат содир этган 9-синф ўқувчиси эҳтиёт чораси сифатида қўлга олинган. Гувоҳларга кўра, у қизалоқларни катта тезликда уриб кетишидан бир неча сония олдин светофорнинг қизил чизиғидан ҳам катта тезликда ўтиб кетган.

Афсуски, йўлларда хавфсизликни таъминлаш учун ҳар турли чоралар кўрилаётганига қарамай, бу чоралар ҳар куни Ўзбекистон йўлларига чиқаётган автоқотилларга қарши ишламаяпти. Нега? Чунки кўп ҳолларда улар муносиб жазоланмаяпти, дея оламиз. Ўта хавфли қоидабузарликлар учун ҳам бир оғиз узр сўраш ёки арзимаган жарима – қилмишнинг ижтимоий хавфлилик даражасига мутлақо номутаносиб. Токи қонун қоидабузарларни ҳам, уларнинг арзанда фарзандларини ҳам тийиб қўёлмас экан, ҳали кўпгина болажонларни йўлларда йўқотамиз.