Тошкент метросида яна поезд тўхтаб қолди. «Тошкент метрополитени» УК ҳолат юзасидан расмий изоҳ берди.
Жорий йил 24 май куни эрталаб соат 08:52да 4-сонли йўналиш бўйлаб ҳаракатланаётган поезд техник сабабларга кўра «Ҳамид Олимжон» бекатида тўхтаб қолган.
«Бу воқеа ҳайдовчи томонидан поезд носозлиги аниқланиши муносабати билан содир бўлди», дейилади «Тошкент метрополитени» хабарида.
Қайд этилишича, йўловчилар вагонлардан туширилган ва поезд захирага, «Пахтакор» станциясининг берк қисмига жўнатилган.
«16-сонли йўналиш бўйича орқадан келаётган поезд йўловчиларни олиб, жадвалга мувофиқ ҳаракатланишни давом эттирди. Келтирилган ноқулайликлар учун узр сўраймиз», дейилади расмий изоҳда.
Тошкент метросида сўнгги ойларда кўплаб кўнгилсиз ҳодисалар кузатилди.
18 март куни «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.
7 апрель куни Тошкент метросида икки поезд тўқнашгани ҳақида хабар тарқалди. Расмий изоҳда техник сабабларга кўра «Ғофур Ғулом» бекатида йўловчилар поезддан туширилиб, захирага келган навбатдаги поездга ўтказиб юборилгани, йўловчилар туширилган поезд бошқа поезд ёрдамида шатакка олиниб, «Беруний» бекатига олиб келингани маълум қилинди.
8 апрель куни Сергели ерусти метросида поезд ярим йўлда тўхтаб қолди. Йўловчилар темир йўл бўйлаб пиёда юришга мажбур бўлди.
9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди.
28 апрель куни туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган.
7 май куни соат 21:10 дан 22:00 гача Тошкент метрополитени Ҳалқа йўлининг 7-бекатида электр энергияси ўчиб қолганди. Метродаги носозлик туфайли шаҳар жамоат транспортида юқори даражадаги тирбандликлар юзага келди. «Чилонзор» йўлида ҳаракат тўхтаб қолгани туфайли бекатларда тўпланиб қолган йўловчилар ташқарига чиқишга мажбур бўлишган.
13 май куни эса Тошкент метрополитени «Амир Темур хиёбони» бекатида барча йўловчилар тушириб юборилди, ижтимоий тармоқларда воқеа акс этган видеолар тарқалди. «Ўзбекистон темир йўллари» компаниясининг ҳолат юзасидан берган изоҳида айтилишича, шу куни Чилонзор йўналишида техник-профилактика ишлари олиб борилиши муносабати билан соат 10:30 дан 11:00 гача поездлар айланмаси «Амир Темур хиёбони» бекатига амалга оширилганди.
