АҚШ тарихда биринчи марта Эрондан нефт импорт қилди

АҚШ 2021 йил мартида тарихда биринчи марта Эрондан нефт импорт қилди. Бундай маълумотни АҚШ энергетика вазирлиги келтириб ўтди. Импорт қилинган нефт ҳажми 1 млн баррелни ташкил қилган. 

1981 йилдан бери АҚШ вазирлиги томонидан олиб бориладиган бу борадаги статистикага кўра, бунгача АҚШ фақатгина 2020 йил октябрда Эрондан 1,1 млн баррел нефт маҳсулотлари импорт қилган.

АҚШ Теҳрон нефтига нисбатан 2018 йил ноябрда санкциялар киритганди. Шундан кейин Вашингтон ярим йил давомида 8та давлатга Эрон нефтини импорт қилишга рухсат берган.

АҚШ энергетика вазирлиги тақдим қилган охирги статистикага кўра, АҚШ март ойида Саудия Арабистонидан 9,5 млн, Россиядан 6,1 млн, Нигериядан 2,9 млн, Анголадан 1,6 млн, Ливиядан 622 минг баррел нефт импорт қилган.

Умумий ҳисобда АҚШ ОПЕКга кирувчи давлатлардан март ойида 20,8 млн баррел, унга кирмайдиган давлатлардан 158,6 млн баррел нефт олган.

Шунингдек, АҚШ март ойида жами 256,9 млн баррел нефт ва нефт маҳсулотлари, жумладан, 179,4 млн баррел нефт импорт қилган.