Мали конституцион суди полковник Гоитани вақтинчалик президент этиб тайинлади

Ассими Гоита чоршанба куни ўзини вақтинчалик президент деб эълон қилганди.

Мали конституцион суди полковник Ассими Гоитани мамлакатнинг вақтинчалик президенти этиб тайинлади. Бу ҳақда ВВС хабар бермоқда.

Ассими Гоита чоршанба куни ўзини вақтинчалик президент деб эълон қилганди. У 2020 йил августда амалга оширилган биринчи давлат тўнтаришига раҳбарлик қилганди.

У Малининг охирги вақтдаги иккинчи вақтинчалик президенти бўлди. Ўтган йили президент Иброҳим Бубакар Кейта ва бош вазир Бубу Сиссе ҳарбийлар томонидан ҳокимиятдан четлатилгандан кейин ўтиш ҳукумати тасдиқланиб, Ба Ндао вақтинчалик президент этиб тайинланганди. Ўтиш даври 1,5 йил давом этиши, сўнгра 2022 йил февралда сайловлар бўлиб ўтиши белгиланганди.

Бироқ 24 май куни ҳарбийлар Ба Ндао, бош вазир Мухтор Уан ва янги мудофаа вазири Сулаймон Дукурни ҳибсга олишди. Кейинроқ улар истеъфога чиқарилди ва ҳибсдан озод қилинди.