Бухорода қалбаки пулларни муомалага киритган шахсга жиноий иш қўзғатилди

Бухоро шаҳрида қалбаки пулдан фойдаланмоқчи бўлган шахс қўлга олинган. Бу ҳақда вилоят ИИБ хабар бермоқда.

Ҳуқуқни муҳофаза қилувчи идоралар томонидан олиб борилган текширувларда Бухоро шаҳар Авшор маҳалласида яшовчи, 2002 йилда туғилган Ҳ.М. бошқа шахслар билан олдиндан жиноий тил бириктириб, шаҳардаги «Раҳматилло» МЧЖга тегишли бўлган савдо дўконидан озиқ-овқат маҳсулотларини харид қилиб, 2 дона сохта 100 000 сўмлик билан ҳисоб-китоб қилгани аниқланган.

Қайд этилишича, вилоят ИИБ Эксперт криминалистика бўлимининг хулосасига кўра, ҳужжатлаштириб олинган ҳар иккала 100 000 сўмлик купюра қалбаки эканлиги тасдиқланган.

Таъкидланишича, ҳозирда ҳолат юзасидан Жиноят кодексининг 176-моддаси 2-қисми билан жиноят иши қўзғатилиб, дастлабки тергов ҳаракатлари олиб борилмоқда.