Хорижга автомобиль экспорти 2,3 баробарга ошди

Жорий йилнинг дастлабки 5 ойи давомида Ўзбекистон 155,4 миллион долларлик автомобиллар экспорт қилди. Бу ўтган йилнинг мос даврига нисбатан 2,3 баробарга кўп.

Январь-май ойлари давомида 55,9 миллион долларлик( ўтган йилга нисбатан 3 фоизга ошган) электр токи, 27,3 миллион долларлик(34 фоизга кўпайган) нефть ва нефть маҳсулотлари, 294,1 миллион долларлик мева ва сабзавотлар экспорт қилинган.

Шунингдек, жорий йилда 1,1 миллиард долларлик тўқимачилик маҳсулотлари экспорти амалга оширилиб, умумий экспортнинг 19,2 фоизини ташкил этган ва ўтган йилга нисбатан 68 фоизга ўсган.

2021 йилнинг январь-май ойлари якунида экспорт бўйича асосий ҳамкор давлатлар таркибида ХХР (экспорт умумий ҳажмининг 14,6 фоизи) ва Туркия (12,1 фоизи) давлатлари етакчилик қилган.

Ўтган 5 ой давомида 2,9 миллиард долларлик машиналар ва транспорт асбоб-ускуналари импорт қилинган. Бу умумий импорт таркибида 32,6 фоизни эгаллаган.

Бундан ташқари, хориждан 143,8 миллион долларлик ўсимлик мойи ва ёғ маҳсулотлари олиб келинган. Бу ўтган йилнинг мос даврига нисбатан 60,4 фоизга кўп.

Аввалроқ, май ойида қарийб 1,2 миллиард долларлик олтин сотилгани маълум қилинганди.