Бухорода бировнинг хонадонига ўғирликка тушган жиноий гуруҳ қўлга олинди 

Бухоро шаҳрида хонадонлардан бирига ўғирликка тушган 47 ёшли эркак ва унинг тошкентлик шериклари ушланди. Бу ҳақда вилоят ИИБ хабар берди.

Маълум қилинишича, Бухоро шаҳар ички ишлар бошқармасига Мутал Бурхонов маҳалласида яшовчи фуқаро хонадонида ўғирлик содир бўлгани ҳамда бир қанча тилла тақинчоқлар, нақд пул ва ноутбук, жами қиймати қарийб 60 миллион сўмни ташкил қиладиган мулк ўғирлаб кетилгани ҳақида мурожаат қилган. 

Олиб борилган тергов ҳаракатлари натижасида ушбу жиноятни Бухоро шаҳрининг Пиридастгир маҳалласида яшовчи, 1974 йилда туғилган М.С. содир этганлиги аниқланган. Шунингдек, у ўзига жиноий шерик сифатида Тошкент вилояти Бўстонлиқ туманида яшовчи икки нафар йигитни қўшиб олганлиги маълум бўлган. 

Айни пайтда жиноий гуруҳнинг бошқа ўғриликларга алоқадорлиги юзасидан суриштирув ҳамда тергов ҳаракатлари давом эттирилмоқда.