Кубада ҳукуматга қарши намойишлар бўлмоқда. Бунақаси охирги бор 30 йил муқаддам кузатилган

Куба пойтахти Ҳавана ва бошқа қатор шаҳарларда мамлакатнинг коммунистик ҳукуматига қарши кўп минг кишилик норозилик акциялари бўлиб ўтмоқда.

Намойишчилар эркинлик, демократия ва ҳукуматнинг коронавирус пандемиясига янада қатъийроқ курашишини талаб қилишмоқда. «Франс пресс» агентлиги хабар беришича, намойишчилар кўтариб чиққан шиорлар орасида шундайларини учратиш мумкин - «диктатура йўқолсин», «коммунизм йўқолсин» ва «биз қўрқмаймиз».

Сўнгги кунларда мамлакатда касалланиш ҳолатлари бўйича рекорд кўрсаткичлар қайд этилган. Фуқаролар ҳукуматдан вакцинация темпини тезлаштиришни талаб қилишмоқда.

Ўтган ҳафтада Кубада маҳаллий Abdala 2 вакцинаси фойдаланиш учун маъқулланганди. Бу Лотин Америкаси ва Кариб ҳавзасида ишлаб чиқилган илк вакцина бўлди.

Аммо намойишчиларни ғазаблантираётган ягона муаммо пандемия эмас. Улар электроэнергияси ва озиқ-овқат маҳсулотлари танқислиги туфайли ҳолдан тойишган.

Куба давлат телевидениесининг хабар қилишича, намойишлар тартибсизликлар билан кечмоқда. Намойишчилар бир нечта дўконларни талон-торож қилиб, у ердан озиқ-овқат маҳсулотларини олиб чиқишган. Шунингдек, улар ва полиция ўртасида тўқнашувлар юз бермоқда.

Ҳукуматга қарши намойишлар - Куба учун камёб ҳодиса. Сўнгги бор бундай чиқишлар 30 йил олдин кузатилган.

Президент Мигель Диас-Канель АҚШ ва «Куба—Америка мафияси»ни мамлакатда норозилик қўзғаб, вазиятни беқарорлаштиришда айблаган.

АҚШ президентининг миллий хавфсизлик масалалари бўйича маслаҳатчиси Жейк Салливан намойишчиларни қўллаб-қувватлаган.

«АҚШ бутун Кубада сўз ва йиғилиш эркинлигини қўллаб-қувватлайди ҳамда ўз базавий ҳуқуқларини амалга ошираётган тинч намойишчиларга қарши ҳар қандай зўравонлик ёки ҳужумларни қатъиян қоралайди», дейилади Салливаннинг твиттер саҳифасидаги баёнотда.

Reuters агентлиги хабарига кўра, айни вақтда Гаванада ҳарбийларнинг пулемётлар билан жиҳозланган автомобилларини учратиш мумкин.

Диас-Канель коммунистларни кўчаларга чиқиб, намойишчиларга қаршилик кўрсатишга чорлаган. У инқилобни ҳимоя қилиш вақти келганини таъкидлаган.

«Биз Америка империясига сотилган аксилинқилобий ёлланмаларга барқарорсизлик келтириб чиқаришга йўл қўймаймиз. Бунга инқилобий жавоб бўлади. Шу сабабли биз барча коммунистларни ушбу иғвогарликлар юз бераётган кўчаларга чиқишга ва ёлланмаларга қарши курашишга чақирамиз.

Биз ўз ҳаётимизни беришга тайёрмиз. Улар инқилобга қарши чиқишса, бизнинг жасадларимиз устидан ўтиб боришларига тўғри келади. Биз барчасига тайёрмиз ва кўчаларда инқилобни ҳимоя қилиб жангга кирамиз», деган Куба президенти давлат телевидениеси эфирида.

Сўнгги марта кубаликлар 1994 йилда Фидел Кастронинг сиёсатига қарши норозилик билдириш билан кўчага чиқишганди. Ўшанда намойишлар фақат пойтахт Ҳаванада бўлиб ўтган ва тезда бостирилган. Шундан кейинги йилларда юз минглаб кубаликлар қайиқларда мамлакатни тарк этган, уларнинг аксари АҚШга йўл олган.