Ҳарбийларнинг бир қисми йил охиригача Ироқни тарк этиши керак.
АҚШ Ироқдаги жанговар миссиясини 2021 йил охиригача якунлайди, дея маълум қилди президент Жо Байден Ироқ бош вазири Мустафо ал Қадимий билан музокаралардан сўнг. Бу ҳақда «РБК» ёзмоқда.
«Менимча, ишлар яхши кетмоқда. Бизнинг Ироқдаги ролимиз - ҳарбий хизматчиларни ИШИДга қарши курашиш бўйича ўқитишни давом эттириш, уларга ёрдам бериш. Аммо жанговар миссия йил охиригача якунланади», деди Байден.
Унинг таъкидлашича, Вашингтон Ироқда демократиянинг мустаҳкамланишини қўллаб-қувватлайди ва мамлакатда октябр ойида парламент сайловлари бўлиб ўтишини хоҳлайди (бу жараён олдинроқ бўлиб ўтиши керак эди, аммо январгача қолдирилди). Президент АҚШнинг хавфсизлик ва терроризмга қарши кураш соҳасидаги ҳамкорликка содиқлигини тасдиқлади.
Ҳозир Ироқда 2 500 нафар америкалик ҳарбий бор. Бироқ, расмийлар бу рақам йил охиригача қандай ўзгаришини ҳали ошкор қилмади.
Ироққа энди ИШИДга қарши курашиш учун АҚШ армияси керак эмас, деди ал Қадимий Байден билан музокаралар олдидан Associated Press'га берган интервьюсида. Унга кўра, хавфсизлик кучлари ва Ироқ армияси коалиция қўшинларисиз мамлакатни ҳимоя қилишга қодир. Ал Қадимий таъкидлашича, Ироқ ҳарбийлари буни ўтган йили террорчиларга қарши мустақил операциялар ўтказиш орқали исботлади.
АҚШ президенти ва Ироқ бош вазири ҳарбий миссия тугаганини эълон қилишга тайёрланаётгани ҳақида Associated Press душанба куни ўз манбаларига таяниб ёзганди. Агентлик суҳбатдошларидан бирининг айтишича, Вашингтон ва Бағдод бунга апрель ойида келишган, аммо ўшанда қўшинларни олиб чиқиш жадвали тасдиқланмаган.
АҚШнинг Ироқдаги ҳарбий миссияси 2003 йилда бошланган. Вашингтон Саддам Ҳусайн ҳукумати оммавий қирғин қуроллари ишлаб чиқаётганини тахмин қилиб, мамлакатга қўшин киритган.
2011 йилда ҳарбийлар мамлакатдан олиб чиқилган, аммо 2014 йилда қўшни Суриядаги фуқаролар уруши ва ИШИД кучайгани шароитида контингент қайтарилган.
Аввалроқ, АҚШ Афғонистондан қўшинларини олиб чиқиш муддатини эълон қилганди. Ҳарбийлар август ойининг бошларига қадар мамлакатдан чиқиб кетиши керак. Аскарларнинг кенг миқёсда олиб чиқилиши бошлангандан сўнг, «Толибон» ҳаракати ҳукумат кучларига қарши ҳужумларини кучайтириб, мамлакат ҳудудининг катта қисмини эгаллаб олди.
