Исроил полицияси билан тўқнашувларда 200дан кўпроқ фаластинлик жабрланди

Иорданнинг ғарбий соҳилида Исроилнинг чегара полицияси билан тўқнашувларда камида 211 фаластинлик жабрланди. Бу ҳақда Фаластин Қизил яримой жамияти маълум қилди.

“Соут Ал-Ақсо” маҳаллий радиостанциясининг жамият баёнотига таяниб хабар беришича, тўқнашувлар Наблус вилоятининг Байт ва Байт-Дожон аҳоли пунктларида юз берган. Исроиллик полициячилар фаластинликларга қарши ўқотар қуролдан ташқари резина ўқлар, кўзни ёшлатувчи газ ва шовқин гранаталари қўллаган.

Бундан ташқари, улар Қизил яримой жамияти тиббий бригадалари ишига тўсқинлик қилиб, уларни резина ўқлар билан ўққа тутган. Бунинг натижасида бир неча шифокор жароҳат олган.

Май охиридан бери Наблуснинг жанубий ҳудудлари аҳолиси Исроил турар жойлар қураётган Собиҳ тоғи чўққиси томон норозилик юришлари амалга ошириб келмоқда. Таъкидланишича, исроиллик полициячилар намойишлар ўтказилишига қаршилик қилиб, фаластинликларга нисбатан куч ишлатмоқда.

Тайёрлаган: Шуҳрат Раҳимов

#Исроил #Фаластин