Чехия ва Германия самолётлари Кобул аэропортига қўна олмади

Чехия ва Германия томонидан ўз фуқароларини эвакуация қилиш учун Афғонистонга жўнатилган самолётлар 16 август кечки пайт Кобул аэропортига қўна олмади. Бунга аэропортнинг учиш-қўниш йўлаги Афғонистонни тарк этишни истаётган одамлар билан тўлиб-тошгани сабаб бўлган.

Натижада Чехиянинг Афғонистонга жўнатилган 2 та самолёти Озарбойжонга жўнашга мажбур бўлган.

DPA ахборот агентлигининг хабар беришича, Германиянинг 2 та A400M ҳарбий транспорт самолёти ҳам Кобулга қўна олмагач, Ўзбекистонга ёнилғи қуйиш учун кетишга мажбур бўлган.

Таъкидланишича, самолётлар Кобул устида қўниш учун қулай вазиятни пойлаб маълум вақт учиб юрган, бироқ охир-оқибат у ердан кетишга мажбур бўлган.

Афғонистонда ҳокимиятни толиблар эгаллагандан кейин 16 августда Кобул аэропортида мамлакатни тарк этишни истовчи юзлаб одамлар тўпланди. Улар учиш-қўниш йўлагига чиқиб, АҚШнинг учиш учун ҳаракатни бошлаган самолётига чиқиб олиш илинжида унинг ортидан югура бошлашган.  

Кейинроқ одамлар аэропортдан учиб кетаётган самолёт қанотларига чиқиб олгани видеолари пайдо бўлган. ОАВнинг маълум қилишича, аэропортда юзага келган бетартиблик вақтида камида 7 киши ҳалок бўлган.

Натижада аэропортдан самолётлар учишини тўхтатишга тўғри келган.

Айни вақтда аэропортдаги хавфсизлик америкалик ҳарбийлар томонидан таъминланмоқда. Шунингдек, у ерда британиялик ҳарбийлар ҳам бор. Уларга Кобулдан хорижий фуқаролар ва мамлакатни тарк этишни истаётган афғонларнинг тезкорлик билан эвакуациясини амалга ошириш вазифаси юкланган.

Аввалроқ Германия канцлери Ангела Меркель Германия Афғонистондан 10 мингга яқин одамни олиб чиқиши кераклигини айтганди.