Норвегияда барча карантин чекловлари бекор қилинади

Норвегия ҳукумати 25 сентябрдан барча карантин қоидалари ва чекловларини бекор қилади. Бу ҳақда Reuters агентлиги хабар берди.

Норвегия бош вазири Эрна Солбергнинг маълум қилишича, эндиликда ижтимоий масофа сақлаш талаб қилинмайди, тунги клублар очилиб, ресторанлар одатий иш фаолиятига қайтади.

“Норвегияда энг қатъий чоралар киритганимиздан буён 561 кун ўтди. Энди одатий турмуш тарзига қайтиш вақти келди”, – деди у.

Бу чекловларни бекор қилиш бўйича тўрт босқичли режанинг сўнгги қисми ҳисобланади. Аммо ушбу қадам касалланиш даражаси сабабли бир неча бор ортга сурилганди.

“Қисқа қилиб айтганда, энди одатдагидек яшаймиз”, – деди Солберг.

Норвегия Жамоат соғлиғини сақлаш институтининг маълумот беришича, мамлакат аҳолисининг 76 фоизга яқини коронавирусга қарши вакцинанинг камида бир дозасини қабул қилган, аҳолининг 67 фоизи эса тўлиқ эмланган.