Мексикадаги газ қувурида бир нечта портлаш юз берди

Мексиканинг Пуэбла штатида Pemex давлат компаниясига тегишли газ қувурида бир нечта портлаш юз берди. Бу ҳақда мамлакат президенти Андрес Мануэль Лопес Обрадор маълум қилди. Портлашлар газни ўғирлашга уриниш сабабли юз бергани тахмин қилинмоқда.

Фото: Reuters / Imelda Medina

Воқеа оқибатида бир киши ҳалок бўлган, 15 киши жароҳат олган. Портлаш оқибатларини бартараф этиш учун фуқаро ҳимояси хизматларининг 1,4 минг ходими жалб қилинган.

Reuters ахборот агентлигининг хабар беришича, Сан-Пабло Хочимеуакан муниципалитетида газ сизиб чиққани ҳақидаги хабардан кейин 1 км радиусда 2 мингга яқин одам эвакуация қилинган. Жароҳатланганлардан 5 нафарининг аҳволи оғир деб баҳоланмоқда.