2021 йилнинг 24 ноябрь куни Ўзбекистон ташқи ишлар вазири Абдулазиз Комилов Норвегиянинг Ўзбекистондаги фавқулодда ва мухтор элчиси (қароргоҳи Осло шаҳрида) этиб тайинланган Жон Микал Квистадни қабул қилди.
Фото: ТИВ ахборот хизмати
Ташқи ишлар вазирлиги хабарига кўра, вазир ишонч ёрлиқларини қабул қилиб, элчини юқори масъулиятли лавозимга тайинлангани билан табриклаган ва фаолиятига омад тилаган.
Суҳбат чоғида сиёсий, савдо-иқтисодий, маданий-гуманитар ва бошқа соҳаларда Ўзбекистон-Норвегия муносабатларининг бугунги ҳолати ва уларни янада ривожлантиришнинг устувор йўналишлари, шунингдек, томонларнинг халқаро ташкилотлар доирасидаги ўзаро ҳамкорлиги муҳокама қилингани айтилади.
Қайд этилишича, бўлажак тадбирлар, хусусан, вазирликлараро сиёсий маслаҳатлашувларнинг навбатдаги даврасини ўтказиш жадвали кўриб чиқилди.
Шунингдек, халқаро ва минтақавий аҳамиятга молик айрим масалалар, жумладан, Афғонистондаги вазият юзасидан фикр алмашилди, дейилади маълумотда.
