Столтенберг НАТО Россиянинг қаршилигига қарамасдан кенгайишини маълум қилди

Аввалроқ Россия президенти Владимир Путин НАТОнинг шарққа кенгаймаслиги борасида юридик кафолат кераклигини айтганди.

Фото: nato.int

НАТО нафақат сўзда, балки амалда ҳам очиқ эшиклар сиёсатини тутади, деди альянс бош котиби Йенс Столтенберг Украина президенти Владимир Зеленский билан ўтказилган музокаралардан сўнг бўлиб ўтган матбуот анжуманида.

У сўнгги йилларда Черногория ва Шимолий Македония НАТОга қабул қилинганини эслатиб ўтди.

«Биз Россиянинг норозиликларига қарамасдан Шимолий альянсни кенгайтирдик», — деди у.

Шунингдек, Столтенберг альянс Европанинг бошқа мамлакатларини НАТОга қўшилишга таклиф этиш имконини берувчи Шимолий Атлантика шартномасининг 10-моддасини эслатди.

Унинг сўзларига кўра, Украинанинг НАТОга қўшилиши тўғрисидаги қарор Киевнинг ўзи ва альянснинг 30 аъзоси томонидан қабул қилинади.

1 декабр куни Россия президенти Владимир Путин НАТОнинг шарққа кенгаймаслиги борасида юридик кафолат кераклигини айтганди. У АҚШ президенти Жо Байден билан мулоқотида ҳам бу мавзуни кўтарди.