Қашқадарёда пиёдалар йўлакчасидаги дарахтлар илдизигача бетонлаб ташланди

Фото: Экология ва атроф-муҳитни муҳофаза қилиш бошқармаси

Қашқадарё вилояти Чироқчи туманида пиёдалар йўлакчасидаги дарахтлар илдизигача бетонлаб кетилган. Бу ҳақда вилоят экология бошқармаси ахборот хизмати хабар бермоқда.

Маълум қилинишича, Қашқадарё вилояти Экология ва атроф-муҳитни муҳофаза қилиш бошқармаси Чироқчи тумани бўлими инспекторлари томонидан ҳудудда экологик назорат рейд тадбири ўтказилган.

Назорат тадбири давомида “Яшил макон” умуммиллий лойиҳаси доирасида экилган дарахтлар ҳолати ўрганилган.

Ўрганиш давомида Чироқчи туман Мустақиллик кўчаси ҳудудида пиёдалар йўлакчасида ўсиб турган катта ёшдаги дарахтлар илдизигача бетонлаб кетилгани аниқланган.

Қайд этилишича, Экология бошқармаси ходимлари талаби билан тезда дарахтларнинг бетонланган илдизлари очилиб, сув қуйиш ва ишлов бериш учун қулай ҳолатга келтирилган.

Аввалроқ Жиззах вилояти Мирзачўл тумани Гагарин шаҳарчасида Халқлар дўстлиги кўчасининг икки томонига экилган 75 туп ёш дарахт пиёдалар йўлакчаси қурилаётганда бетонлаб ташланганди. Шунингдек, Тошкент шаҳри Чилонзор тумани Лутфий кўчасидаги 56 туп дарахтнинг таги ландшафт яратиш важи билан полиэтилен плёнка билан ўраб ташланганди.