Вазирлик расмийси офлайн таълимга қайтиш ва 2-семестр бошланиши бўйича изоҳ берди

Олий ва ўрта махсус таълим вазирлиги бошқарма бошлиғи Абдували Холиқов олийгоҳларда  офлайн таълимга қайтиш курслар бўйича босқичма-босқич бўлиши ҳақидаги тушунмовчиликларга изоҳ берди.

“7 февралдан бошланадиган офлайн дарсларга боришни хоҳламаган талаба 14 февралда ҳам дарсда қатнашишни истамайди. Шуни алоҳида эътиборга олиш керак. Олий ва ўрта махсус таълим вазирлиги томонидан берилган расмий хабарда таъкидланганидек, нечанчи курсда ўқиётганидан қатъи назар, барча талабалар 7 февралдан олий таълим муассасаларида бошланадиган анъанавий таълим жараёнида иштирок этишади.

1- ва 2-курслар учун алоҳида ўқиш графигини тасдиқлаган олий таълим муассасалари ҳам бор. Бу ерда битта нарсани алоҳида эътиборга олиш керакки, 60дан ортиқ ОТМларда 1- ва 2-курсларда ўқиётган талабалар кредит-модуль тизимида таҳсил олишади. Ўзбекистондаги барча университет ва институтларнинг талабалари ушбу тизим бўйича ўқийди.

Бу тизим жорий этилгандан кейин 1-семестрнинг ўқув ҳафталари 15 ҳафтага қисқарди. Натижада декабрнинг охиригача ушбу семестр якунланган. Аксарият талабалар баҳоларини ҳам олиб бўлишган. Қарздор талабаларга семестрлар оралиғида 4 ҳафталик муҳлат берилган. Бу вақтда қарздор талабалар ОТМга келиб, қарзларини топширишади. Қарздор бўлмаган талабалар шундоқ ҳам таътилда бўлади бу даврда.

Мана шулар инобатга олиниб график қилинганки, биринчи ва иккинчи курс талабаларининг ўқиш муддати аслида аввалдан ўқув режаларида белгилаб қўйилган. Шу нарса бугунги кунда айрим тушунмовчиликларга сабаб бўляпти.

Барча талабалар курсидан қатъи назар 7 февраль, душанба кунидан ўқув жараёнида иштирок этади. Амалиётдаги талабалар амалиётини давом эттиради. Фақатгина 2-семестрни 14 ё 21 февралдан бошлаши аввалдан белгилаб қўйилган талабалар ўқишни ўқув режасида кўрсатилган вақтдан бошлашади”, деди Олий ва ўрта махсус таълим вазирлиги бошқарма бошлиғи Абдували Холиқов Халқаро пресс-клубнинг бугунги сессиясида.

Эслатиб ўтамиз, аввалроқ Тошкент давлат техника университетида ва ТАТУнинг Қарши филиалида офлайн таълимга босқичма-босқич қайтилиши маълум бўлганди.