Путин Хавфсизлик кенгашининг режадан ташқари йиғилишини чақирди

Россия президенти Владимир Путин 21 февраль куни Россия Хавфсизлик кенгашининг навбатдан ташқари йиғилишини чақирган. Бу ҳақда президент матбуот котиби Дмитрий Песков маълум қилган.

«Бу катта хавфсизлик кенгаши», - деб таъкидлади у.

Журналистларнинг Хавфсизлик кенгаши йиғилиши шошилинч ёки одатий экани борасидаги саволига жавобан президент матбуот котиби бу йиғилишни «доимги эмас»лигини айтган. Йиғилиш кун тартибидан қандай масалалар ўрин олгани ҳақидаги саволга Дмитрий Песков жавоб қайтармаган.

Песковнинг сўзларига кўра, Владимир Путин душанба куни «яна бир неча халқаро телефон мулоқотлари» режалаштирган.

Қонунчилик тайёрланмоқда

Ўтган ҳафтада 22 февраль куни Федерация кенгашининг навбатдан ташқари йиғилиши ўтказилиши хабар қилинганди. Расмий хабарга кўра, сенаторлар Ватан ҳимоячилари куни арафасида ҳарбий хизмат фахрийлари учун пенсия миқдорини кўтариш ҳақидаги қонунни муҳокама қилиши кўзда тутилган.

Аммо кўплаб политологлар парламент юқори палатасининг навбатдан ташқари чақирилиши Россия ва Украина чегарасидаги вазият кескинлашуви билан боғлиқлигини айтишган.

22 февраль куни Давлат думаси йиғилиши ҳам ўтказилади, аввалроқ депутатлар президентга ўзини ўзи мустақил деб эълон қилгна ДХР ва ЛХРни тан олишни сўраб мурожаат қилганди.

ДХР ва ЛХР вакилларининг сўзларига кўра, сўнгги кунларда Россия ва Украина чегарасидаги вазият янада кескинлашган. Руспараст айирмачилар украиналик ҳарбийлар уларнинг позицияларига ҳужум қилишга тайёрланаётганини иддао қилишган.

Душанбага ўтар кечаси, ЛХР вакилининг маълум қилишича, Украина армияси ўт очиши оқибатида тинч аҳоли вакилларидан икки киши ҳалок бўлган ва турар жой вайронага айланган. Шунингдек, Донецк аэропорти ҳудудидаги портлаш ва артиллерия ўқ-дори омбори портлатилгани ҳақида хабарлар берилган - бу ишлар «душманнинг диверсия гуруҳлари бостириб кириши» оқибатида рўй бергани айтилган.

Киев ўт очаётгани ва ҳарбий фаолликка киришгани ҳақидаги хабарларни рад этиб, Москва томонидан қўлланадиган айирмачиларни эскалация учун баҳона тайёрлаш мақсадида провокация қилаётганликда айблаган.

Ўтган ҳафтада Донбасснинг ДХР ва ЛХР назоратидаги ҳудудларидан аҳолини эвакуация қилиш бошланди. ДХР ҳукумати Россияга 700 мингга яқин кишини эвакуация қилиш режалаштирилганини маълум қилган. Душанба кун ҳолатига кўра, Россия чегарасидан 61 минг қочқин ўтган.