Абдулла Қодирий метро бекатида поезд тўхтаб қолди

Бугун, соат 13:37да Тошкент метрополитенининг Юнусобод йўналиши Абдулла Қодирий бекатига етиб келган поезд тўхтаб қолди. Воқеа жойида бўлган Kun.uz мухбирининг хабар беришича, вагонларда бўлган тахминан 200 нафар йўловчи бекатга туширилган.

Поезднинг тўхтаб қолиш сабаблари маълум эмас. Тахминан ярим соатлардан кейин бошқа поезд келиб йўловчиларни олиб кетган.

Ҳозирча Тошкент метрополитени ҳолатга муносабат билдирмади.

Бу – метро тўхтаб қолиши билан боғлиқ 2022 йил феврал ойидаги камида учинчи ҳодиса. Аввалроқ, 6 февраль куни Мустақиллик майдони бекатида ҳаракат хавфсизлигини таъминлаш мақсадида метро ҳаракат таркибининг техник мосламалари текширилгунга қадар тўхтаб турган эди.

Шунингдек, 5 февраль оқшомида ҳам Тошкент метроси поезди “Халқлар дўстлиги” ва “Миллий боғ” бекатлари оралиғида тўхтаб қолганди.