Абрамович «Челси»ни сотишини эълон қилди. ЕЧЛнинг амалдаги ғолибига 4 миллиард евро нарх қўйилган.
Россиялик бизнесмен Роман Абрамович ўзига тегишли бўлган британ футбол клуби «Челси»ни сотишга қарор қилди.
Бизнесмен клуб сотувидан тушган пуллар хайрия фондига ўтказилиши ва Украинадаги урушдан жабр кўрганларга ёрдам учун ажратилишини маълум қилган.
«Бу мен учун ҳеч қачон бизнес бўлмаган. Шунчаки бу ўйинни ва жамоани яхши кўраман. Клубнинг сотилишидан тушган пуллар махсус фондга ўтказилади. Фонд Украинадаги урушдан жабр кўрганларга хайрия қилиш учун сарфланади. Фонддаги пуллар кечиктириб бўлмайдиган нарсалар сотиб олишга, шунингдек, [Украинани] тиклаш жараёнига сарфланади.
Бу қарорни қабул қилиш осон бўлмади. Клубдан бу тарзда кетиш жуда қийин бўляпти. «Стэмфорд Бриж»га охирги марта бориб, барчангиз билан хайрлашишга умид қиламан. Биргаликда қўлга киритган ғалабаларимиздан фахрланаман. «Челси» ва мухлислари доим юрагимда қолади. Ҳаммангизга раҳмат. Роман», деб якунлаган Абрамович баёнотини.
ОАВда хабар қилинганидек, Абрамович Россиянинг Украинага босқини туфайли Буюк Британиядаги активлари санкция остига тушиши мумкинлиги учун уларни сотишга киришган.
24 февраль куни Британия бош вазири Борис Жонсон Россия банклари ва амалдорларига қатъий санкциялар ҳақида эълон қилган, шунингдек, юздан ортиқ шахслар ва компаниялар активлари музлатилиши мумкинлигини айтганди.
Бундан ташқари, Жонсон бадавлат россияликлар ўз бойлигини қандай топгани бўйича текширувлар ўтказишни ваъда қилганди. «Олигархлар ҳеч қаерга яширина олмайди», деганди у.
Роман Абрамович 2003 йилда «Челси»ни англиялик Кена Бейтсдан 140 миллион фунт эвазига сотиб олганди ва уни ривожлантириш учун 1,5 миллиард фунтдан ортиқ маблағ сарфлаган.
Бу давр мобайнида «Челси» тўрт карра Англия чемпиони бўлди, Чемпионлар лигаси ва Европа лигасида икки мартадан ғолиб чиқди, беш бор Англия Кубогида, уч марта Англия Лигаси Кубогида ҳамда икки марта Англия Суперкубогида бош совринни ўзиники қилди.
2021 йил августида лондонликлар УЕФА Суперкубогини қўлга киритган, бир ой муқаддам клублар ўртасидаги жаҳон чемпионатида зафар қучган. Шу тариқа, Абрамович раҳбарлигида «Челси» қўлга киритиш мумкин бўлган барча ютуқларга эришган.
«Челси» учун мураккаб ҳафта
- 24 февраль: Россия президенти Владимир Путин Украинага ҳарбий босқин бошлади.
- 25 февраль: депутат Крис Брайант (Лейбористлар партиясидан) Роман Абрамовични «Челси»га эгалик қилиш ҳуқуқидан маҳрум этиш ва унинг активларини хатлашни таклиф қилиб, буни унинг коррупцион жиноятларга алоқадор бўлиши мумкинлиги билан изоҳлади.
- 26 февраль: Абрамович «Челси» устидан назоратни клуб номидаги хайрия фонд васийларига топширганини эълон қилди.
- 27 февраль: Васийлар кенгаши аъзолари клубни қонуний равишда бошқаришлари даргумон экани борасида хавотирларини билдиришди.
- 28 февраль: Украина Абрамовичга мурожаат қилиб, Росси билан «тинчлик келишуви»га эришиш йўлидаги саъй-ҳаракатларни қўллаб-қувватлаш учун ёрдам сўради.
- 2 март: Швейцариялик миллиардер Ҳансйорг Висс унга «Челси»ни Абрамовичдан сотиб олишни таклиф қилишганини айтди.
- 2 март: Абрамович клубни сотмоқчилиги ҳақида эълон қилди.
Олдинроқ Роман Абрамович Украина ва Россия ўртасида тинчлик келишуви бўлиши учун ўртада воситачилик қилишга тайёрлиги ҳақида хабарлар пайдо бўлганди.
