Молдовада бўлган 94 нафар ўзбекистонлик Руминиядан эвакуация қилинади

Молдовада бўлиб турган 94 нафар ўзбекистонлик Бухарест аэропортидан эвакуация қилинади. Бу ҳақда Ташқи ишлар вазирлиги хабар бермоқда.

Қайд этилишича, 2022 йил 9 март куни Украинадан Полшанинг Катовице аэропорти орқали 245 нафар Ўзбекистон фуқароси, шу жумладан 35 нафар аёл, 20 нафар вояга етмаган шахс ва 3 нафар чақалоқ олиб келинди.

28 февралдан 10 мартга қадар 22 та авиарейс ташкиллаштирилди ҳамда ҳарбий ҳаракатлар кечаётган ҳудудлардан 5 282 нафар ўзбекистонлик қайтарилди.

“Молдова ҳудудида бўлган 94 нафар фуқаро Ўзбекистон дипломатлари ҳамроҳлигида Молдова-Руминия чегарасини кесиб ўтди”, дейилади хабарда.

Маълум қилинишича, уларни махсус рейс билан Бухарест аэропортидан эвакуация қилиш режалаштирилган.