Путин Украина билан музокаралар боши берк кўчага кириб қолганини айтди

Владимир Путиннинг сўзларига кўра, Россия ва Украина делегациялари Туркияда ўтказилган музокараларда келишувларнинг муайян даражасига чиққанди.

Фото: AFP/Getty Images

Украина Истанбулда эришилган келишувлардан узоқлашиб кетди ва музокараларни боши берк вазиятга қайтарди, деди Россия президенти Владимир Путин беларуслик ҳамкасби Александр Лукашенко билан музокаралардан сўнг.

Унинг сўзларига кўра, Россия ва Украина делегациялари 29 март куни Туркияда ўтказилган музокараларда келишувларнинг муайян даражасига чиққанди. Унга кўра, Украина учун хавфсизлик кафолатлари Қрим, Севастопол ва Донбассга тааллуқли бўлмаслиги керак эди.

«Сўнгра биз келишув жараёнини давом эттириш учун шароитлар яратишга ҳаракат қилдик. Бунинг ўрнига Бучадаги провокацияга дуч келдик ва энг асосийси, Украина томони Истанбулдаги келишувлардан узоқлашиб кетди», — деди Путин.

Путиннинг айтишича, эндиликда хавфсизлик талаблари бошқа, Қрим, Севастопол ва Донбасс масаласи келишувлар доирасидан чиқиб кетган.

«Яъни яна ўзлари ва барчамиз учун боши берк вазиятга қайтишди», - деди у.

#Россия #Украина #Владимир Путин