Беларусда Лукашенкони текширувдан ўтказган шифокор қўлга олинди 

Беларусда президент Александр Лукашенкони текширувдан ўтказган шифокор пора олишда айбланиб қўлга олинди. Лукашенко бу ҳақда соғлиқни сақлаш вазири, бош прокурор ва ДХҚ раиси билан учрашувда айтди.  

БелТА агентлигининг хабар беришича, учрашувда пора олишда айбланаётган ортопедларга оид жиноят иши тўғрисида сўз борган.  

«Бугунга қадар 35 киши қўлга олинди. Ишончим комил, бу бирга ўтирадиганларнинг барчаси қўлга олинди дегани эмас», — деди у. 

Лукашенконинг сўзларига кўра, шифокорлар «операция столи устида ётган беморларга қандай импорт ортопедик эҳтиёт қисмларни сотиб олишни тавсия қилишган» ва «бу тавсиялари учун хорижликлардан пора олиб келишган». Айримларнинг уйларидан 650 минг еврогача нақд пул чиққан. 

«Ачинарлиси, уларнинг орасида президентни бир неча марта текширувдан ўтказган "президентни даволовчи врач" ҳам бор. Бу фактдан афсусдаман, лекин қонун барчага баробар», — дея қўшимча қилди Лукашенко.