Литва Калининградга транзитларни тақиқлагани тўғрисидаги хабарларни рад этди

Литва ташқи ишлар вазирлиги Калининград областига юк транзитларини тақиқлагани тўғрисидаги Россия ҳукуматининг иддаосини рад этди.

"Йўловчилар ва санкцияларга тушмаган юкларнинг Калининград областига ва у ердан Литва орқали транзит қилиниши тўхталишларсиз давом этмоқда. Литва ҳеч қандай бир томонлама, индивидуал ёки қўшимча чекловлар киритмади. Литва ЕИ санкциялари бажарилишини таъъминламоқда", - дейилади мамлакат ташқи ишлар вазирлиги баёнотида.

Бундан ташқари, хабар берилишича, Литва ташқи ишлар вазирлигида Россия вакили Сергей Рябокон билан учрашув ўтказилган.

Рябоконга ЕИ чеклов чоралари бўйича тушунтириш берувчи дипломатик нота топширилган. 

Қайд этилишича, 15 мартда тасдиқланган тўртинчи санкциялар пакетида ЕИ орқали Россия пўлати ва бошқа қора металларидан тайёрланган буюмлар транзити тақиқланиши кўзда тутилган ва бу тақиқ 17 июндан кучга кирган.

Аввалроқ Россия ташқи ишлар вазирлиги гўёки Литва орқали Калининград областига ва у ердан Россияга юклар транзити тақиқланганини танқид қилганди.

20 июн куни Литванинг Россиядаги вақтинчалик ишончли вакили Виргиния Умбрасене Россия ташқи ишлар вазирлигига чақирилган ва унга протест билдирилган.