Қорақалпоғистон масаласида Эрон ҳам Ўзбекистонни қўллади

5 июл куни Ўзбекистон ташқи ишлар вазири в.б. Владимир Норов Эрон Ислом Республикаси ташқи ишлар вазири Ҳусайн Амир Абдуллаҳиён билан телефон орқали мулоқот қилди.

Фото: Anadolu Agency

“Ҳ.Абдуллаҳиён Эрон томони Ўзбекистон раҳбариятининг мамлакатда тинчлик, осойишталик ва миллатлараро тотувликни таъминлаш борасидаги саъй-ҳаракатларини тўлиқ қўллаб-қувватлашини тасдиқлади”, дейилади Ўзбекистон ТИВ хабарида.

Эрон ташқи ишлар вазирига Қорақалпоғистондаги мавжуд ҳолат, вазиятнинг беқарорлашувига йўл қўймаслик, минтақада жамоат тартибини мустаҳкамлаш бўйича кўрилаётган чора-тадбирлар, Ўзбекистондаги Конститутсиявий ислоҳотнинг мазмуни ва асосий йўналишлари тўғрисида атрофлича маълумот берилди, дея қўшимча қилган ТИВ матбуот хизмати.

Шунингдек, Ўзбекистон–Эрон кўп қиррали муносабатларини кенгайтиришнинг долзарб масалалари кўриб чиқилди.

“Ташқи сиёсат маҳкамалари раҳбарлари бир-бирларини яқинлашиб келаётган Қурбон ҳайит байрами билан табриклаб, Ўзбекистон ва Эроннинг халқларига фаровонлик ва равнақ тилаб қолишди”, дейилади хабарда.

Владимир Норов 4 июл куни Қорақалпоғистон масаласида туркиялик ҳамкасби Мавлут Човушўғли билан ҳам телефонлашган эди.

#Қорақалпоғистон #Эрон #Владимир Норов #ТИВ

1-2 июл кунлари Қорақалпоғистон маркази Нукус шаҳрида тартибсизликлар кузатилди. Миллий гвардия ходимлари билан тўқнашувларда 200 дан ортиқ киши яраланган, 18 киши ҳалок бўлган.