Россияда маймун чечаги билан касалланишнинг биринчи ҳолати аниқланди

Россия Федерациясида маймун чечаги инфекциясининг биринчи ҳолати аниқланди, бемор Европа давлатларига саёҳатдан қайтиб келган. Бу ҳақда Роспотребнадзор маълум қилди, дея хабар бермоқда «Интерфакс».

Фото: Pablo Blazquez Dominguez / Getty Images

«Касаллик Европа сафаридан қайтган ва характерли тошма билан тиббий муассасага мурожаат қилган ёш йигитда аниқланди», — дейилади идора маълумотида.

Аниқлик киритилишича, бемордан олинган биоматериаллар зудлик билан Роспотребнадзор муассасасига юборилган, тадқиқот натижаларига кўра, маймун чечаги инфекцияси тасдиқланган.

«Бемор изоляция қилинган ва юқумли касалликлар шифохонасида бўлиб турибди. Касаллик енгил шаклда кечяпти. Беморнинг ҳаётига ҳеч қандай таҳдид йўқ. Беморнинг Россияда бўлган вақтида алоқа доираси чекланган эди. У квартирада ёлғиз яшаган», дейилади хабарда.

Роспотребнадзорнинг таъкидлашича, барча алоқада бўлган шахслар ўз вақтида аниқланган ва шифокорлар назорати остида.

«Агар ташхис тасдиқланса, уларга барча зарур тиббий ёрдам кўрсатилади. Ўз вақтида олиб борилган эпидемиологик текширувлар натижасида инфекциянинг янада тарқалиши эҳтимоли тўхтатилди. Вазият Роспотребнадзорнинг қаттиқ назорати остида», — дейилади идора хабарида.

Таъкидланганидек, Роспотребнадзорнинг «Вектор» маркази томонидан илгари ҳудудларга юборилган тест тизими туфайли биринчи ҳолатни тезда аниқлаш мумкин бўлган. Тест пайтида касаллик ҳолатлари қайд этилган мамлакатлардан келганларга алоҳида эътибор берилди.

Роспотребнадзор, шунингдек, илгари чечакка қарши эмланганларда оғир маймун чечаги касаллигини юқтириб олиши хавфи камайишини эслади, чунки «барча поксвируслар яхши ўзаро иммунитетни таъминлайди».

Маймун чечаги кам учрайдиган юқумли касаллик бўлиб, Марказий ва Ғарбий Африканинг чекка ҳудудларида кенг тарқалган. Унинг белгилари - кўнгил айниши, иситма, тошма, қичишиш ва мушаклардаги оғриқ.

7 июль куни Жаҳон соғлиқни сақлаш ташкилоти 27 июндан 3 июлгача бўлган ҳафтада дунё бўйлаб одамларда маймун чечаги инфекциясининг 2,6 мингга яқин янги ҳолати аниқлангани ҳақида хабар берди - бу аввалги ҳафтага нисбатан 77 фоизга кўп. 1 январдан 4 июлгача 59 та мамлакат ва ҳудудларда жами 6 027 та маймун чечаги инфекцияси ва касаллик оқибатларидан 3 та ўлим ҳолати аниқланган.

11 июль ҳолатига кўра, 59 та эндемик бўлмаган мамлакат ва ҳудудларда 9000 дан ортиқ инфекция ҳолати қайд этилди.