Италияда «Путин саройи»нинг архитекторига тегишли мол-мулклар хатланди

Ланфранко Чириллонинг хатланган мол-мулклари қиймати 141 млн еврога тенг деб баҳоланмоқда.

Фото: navalny.com

Италия молиявий гвардияси россиялик VIP-мижозлар буюртмасини бажариш билан шуғулланувчи тадбиркор ва архитектор Ланфранко Чириллога тегишли кўчар ва кўчмас мулкларни хатловга олди. Бу ҳақда RaiNews24 телеканали хабар берди.

Хабарда айтилишича, унга нисбатан солиқ қонунчилигини бузиш айблови эълон қилинган.

Архитекторнинг кўчмас мулки, банк ҳисобрақамлари, нақд пуллари, қимматбаҳо буюмлари, санъат асарлари ва вертолёти хатланган. Хатловга олинган мол-мулкларнинг умумий қиймати 141 млн еврога тенг деб баҳоланмоқда.

Чирилло Россиядан йирик буюртмалар олиши билан танилган. Хусусан, Алексей Навальний «Путиннинг саройи» деб атаган иншоотни ҳам у лойиҳалаштирган.