Анатолий Чубайс Италиядаги касалхонадан чиқди

«Роснано» собиқ раҳбари июль ойи охирида Гийен-Барре синдроми ташхиси билан касалхонага ётқизилган эди. У Франкфурт-Майнда реабилитация курсидан ўтади, деб ёзади La Repubblica.

Фото: Picture Alliance

1990-йилларда Россиядаги иқтисодий ислоҳотларнинг мафкурачиси ва етакчиларидан бири, Гийен-Барре синдроми ташхиси билан Италияда касалхонага ётқизилган Анатолий Чубайс шифохонадан чиқарилди, деб хабар берди «Эхо Москвы» радиостанцияси бош муҳаррири Алексей Венедиктов. 7 июль, якшанба куни ўз Telegram-каналида.

Италиянинг La Repubblica газетаси ҳам Чубайснинг чиқарилгани ҳақида ёзган. Нашр маълумотларига кўра, «Роснано» собиқ раҳбарига 6 август куни эрталаб жавоб берилган ва у Франкфурт-Майнга кетган, у ерда реабилитация курсидан ўтади. «Анатолий Чубайс 6 август куни эрта тонгда клиникадан чиқарилди. У Mater Olbia’ни бошқалар ёрдамисиз тарк этди», - дея хабар берди газета.

La Repubblica’нинг ёзишича, италиялик шифокорлар ташхис тўғри қўйилганига шубҳа қилмаяпти – Гийен-Барре синдроми. «Токсикологик тестлар натижалари ҳали чиқмади, аммо россиялик менежернинг организми даволаш усулига реакция берди, шунинг учун шифокорлар бу Гийен-Барре синдроми эканини билдирди. Бу унинг қўллари ва оёқларини блоклаб қўйган оғир неврологик касаллик, аммо заҳарланиш эмас», деб ёзади газета.

Анатолий Чубайс Кипрдан Италияга учиб келганидан сўнг касалхонага ётқизилди. Бу ҳақда биринчи бўлиб россиялик журналист ва сиёсатчи Ксения Собчак хабар берди. Шунингдек, у Чубайснинг касалхонадаги бир нечта фотосуратларини эълон қилди. Чубайс касалхонага ётқизилганидан сўнг, ўртача оғирликда эканлигини билдирди. Кремль Чубайснинг тезроқ тузалиб кетишини тилаб, Россия раҳбарияти унинг касалхонага ётқизилиши тафсилотларидан хабардор эмаслигини таъкидлади.

La Repubblica нашрининг ёзишича, Чубайс касалхонада бўлганида Темпьо-Паузания шаҳри прокурори томонидан сўроқ қилинган, Италия карабинерлари махсус бўлинмаси мутахассислари эса заҳар қидириш бўйича токсикологик таҳлил ўтказган.

2020 йил декабригача Анатолий Чубайс «Роснано» давлат корпорациясини бошқарган, кейин эса РФ президентининг халқаро ташкилотлар билан алоқалар бўйича махсус вакили бўлиб ишлаган. Шу йилнинг март ойида Чубайс истеъфога чиқди ва Россияни тарк этди. Тасдиқланмаган маълумотларга кўра, у кетишини Россиянинг Украинага бостириб киришидан норози экани билан изоҳлаган. ТАСС агентлиги Чубайс ва унинг атрофидагилар коррупция учун текширилаётгани ҳақида хабар берди, бироқ бу маълумот расман тасдиқланмади.