Петербургда 46 ёшли ўзбекистонлик ватандошини ўлдирганликда гумонланмоқда

Санкт-Петербургда дарё қирғоғидан 23 ёшли Ўзбекистон фуқаросининг жасади топилди.

Фото: ura.ru

«Фонтанка» нашрининг ёзишича, дастлабки суд-тиббий экспертиза хулосасига кўра, ўзбекистонлик бош қисмидан олинган зарба натижасида вафот этган.

«Ўлим сабабини аниқлаш учун жасад ўликхонага юборилган, афтидан, ҳуқуқ-тартибот идоралари ходимлари ҳеч қандай жароҳатни кўрмаган. Маълум бўлишича, йигит бошига тушган зарбадан вафот этган», дейилади хабарда.

Воқеадан сўнг ҳуқуқ-тартибот идоралари ходимлари ўлимга сабаб бўлган баданга қасддан оғир шикаст етказиш моддаси бўйича жиноят иши қўзғатди.

Қотилликда гумонланиб, 46 ёшли Ўзбекистон фуқароси қўлга олинди. Қайд этилишича, 9 август куни ётоқхонада у билан марҳум ўртасида жанжал келиб чиққан, бу вақтда у эркакнинг бошига тепган.

Гумонланувчи эҳтиёт чорасини танлаш масаласи ҳал қилинаётган вақтда ушланиб, вақтинчалик сақлаш ҳибсхонасига жойлаштирилди.

Тайёрлаган: Отабек Матназаров

#Петербург #жиноят