Амир Темур мақбараси маданий мерос объектида реставрация ишлари олиб борилмоқда. Бу ҳақда Маданий мерос агентлиги хабар қилди.
2022 йилда Самарқанд шаҳрида Шанҳай ҳамкорлик ташкилоти (ШҲТ)га аъзо давлатлар раҳбарлари навбатдаги саммити ўтказилиши юзасидан Амир Темур мақбарасида таъмирлаш-тиклаш ишларини олиб бориш белгиланган.
Маълум қилинишича, Самарқанд шаҳрида жойлашган «Амир Темур» мажмуасида гумбаз ва девор олд қисми, галерея пол қисмлари ва пештоқни қайта таъмирлаш учун 3 млрд сўм маблағ ажратилган.
Амир Темур мақбарасини реставрация қилиш ишлари бундан ярим асрдан зиёд вақт олдин, яъни 1941 йилда амалга оширилган бўлиб, 1996 йилда қисман таъмирлаш ишлари олиб борилган.
Билдирилишича, 6 асрлик тарихга эга саркарда сағанасида олиб борилаётган реставрация жараёнлари Маданий мерос агентлиги назорати остида ва малакали уста-реставратор, хаттот, олим, инженерлар ва бошқа соҳа мутахассисларини жалб этилган.
Марказий Осиё меъморчилиги ноёб асари сифатида эътироф этиладиган Амир Темур мақбараси Самарқанд жануби-ғарбий қисмида жойлашган бўлиб, XIV аср охирида Темурий шаҳзода Муҳаммад Султон томонидан қурилган мадраса ёнида тикланган. Мақбара қурилиши Амир Темур ҳукмронлиги даврида бошланиб, Мирзо Улуғбек даврида тугалланган.
