Украина 606 нафар Россия ҳукумати вакилига қарши санкциялар киритди

Россия Хавфсизлик кенгашининг 28 аъзоси, Федерациялар кенгашининг 154 аъзоси ва Давлат думасининг 424 депутатига жазо чоралари жорий этилди.

Фото: Reuters

Украина Россия федерал ҳукуматининг 606 нафар вакилига қарши санкциялар киритди. Тегишли қарор Миллий хавфсизлик ва мудофаа кенгаши томонидан қабул қилинди, деди Украина президенти Володимир Зеленский 7 сентябр, чоршанба куни кечки видеомурожаатида.

Россия Хавфсизлик кенгашининг 32 аъзосидан 28 нафарига, Федерациялар кенгашининг 170 аъзосидан 154 нафарига ва Давлат думасининг 450 нафар депутатидан 424 нафарига нисбатан жазо чоралари қўлланилган. Президент Россиянинг ҳукмрон элитаси вакилларидан қайси бири санкцияларга дучор бўлмагани, шунингдек, кўрилган чоралар ҳақида маълумот бермади.

«Уларнинг барчаси бу уруш, халқимизга қарши террор учун жавобгардир. Уларнинг ҳеч бири жавобгарликдан қутулиб қолмайди. Бу - вақт масаласи», - деди Зеленский. Унга кўра, Украина Россия раҳбариятини жавобгарликка тортиш учун зарур ҳуқуқий, дипломатик ва сиёсий қадамларнинг бир қисмини аллақачон амалга оширган ва бу йўналишда ҳаракат қилишни давом эттириш ниятида.

#Россия #Украина