Украина президенти Володимир Зеленский айни вақтда Владимир Путин билан музокара ўтказишга тайёр эмаслигини айтди. У CNN журналистининг шу ҳақдаги саволига шундай жавоб қайтарди.
«Бугун эмас. Мен Россия томонидан конструктив бўлиш истагини кўрмаяпман. Ультиматумларга келсак: мен учун ким ультиматумлар қўйиши муҳим эмас — у ёки бошқа кимдир [Путин президентлик лавозимидан кетган тақдирда]. Менинг принципим шундай: мен ультиматумлар қўядиганлар билан гаплашмайман», — деган Украина президенти.
Зеленский Россия билан келишув фақат Украинанинг РФ томонидан эгаллаб олинган ҳудудлари озод этилгач имзоланиши мумкинлигини айтган.
«Барибир Россия биз билан чегарадош, барибир бу жуда кўп аҳолига эга қўшнимиз, шунинг учун деоккупациядан кейин бизнинг мамлакатимиз улар билан қўшни сифатида яшашига тўғри келади», — деган у.
- Зеленскийнинг CNN телеканалига берган интервьюси украин ҳарбийларининг Харкив областидаги улкан муваффақиятлари ортидан эълон қилинди. Сентябр ойида беш кун ичида улар РФ ҳарбийлари ойлар давомида эгаллаб турган ва Донецк областига ҳужум қилиш учун фойдаланган катта ҳудудларни қайтариб олди. РФ мудофаа вазирлиги бу ҳудудлардан чекинишини «Донбассдаги саъй-ҳаракатларни кучайтириш» учун «қўшинларни қайта жамлаш ва кўчириш» сифатида изоҳлади.
