Ўзбекистонда қайси давлатларнинг капитали иштирокидаги корхоналар сони кўп экани маълум қилинди. Давлат статистика қўмитаси тегишли хабар билан чиқди.
Қўмита маълумотларига кўра, 2022 йил 1 сентябрь ҳолатига республикада фаолият кўрсатаётган хорижий капитал иштирокидаги корхона ва ташкилотлар сони 14 706 тани ташкил этган.
Фаолият кўрсатаётган хорижий капитал иштирокидаги корхоналар сони ўтган йил мос даврига нисбатан 1 617 тага ошган.
Хорижий капитал иштирокида фаолият кўрсатаётган корхоналар давлатлар кесимида сони бўйича Россия етакчилик қилмоқда – 2 762 та корхона.
Кейинги ўринлардан 2 071 та корхонага эга Туркия ва 2 044 та корхонага эга Хитой жой олди.
Шунингдек, хорижий капитал иштирокида фаолият кўрсатаётган корхоналар сони бўйича Қозоғистон ва Корея ҳам етакчи бешталикдан жой олган. Мос равишда, 1 195 та ва 910 та корхона.
Хорижий капитал иштирокида корхоналарнинг бошқа давлатлар кесимида сони:
- АҚШ – 320 та;
- Қирғизистон – 291 та;
- Тожикистон – 283 та;
- Озарбойжон – 247 та;
- Германия – 213 та;
- Туркманистон – 171 та;
- бошқалар – 4 199 та.
