Словакия Финландия ва Швециянинг НАТОга қўшилишини маъқуллади

Словакия президенти Зузана Чапутова Финландия ва Швециянинг НАТОга қўшилиши ҳақидаги келишувни имзолади. «Скандинавия иккала давлати ҳам ўз аъзолиги ҳамда мудофаа салоҳияти билан иттифоқни янада мустаҳкамлайди, шу орқали бизнинг жамоавий чидамлилигимизни оширади. Янги иттифоқчиларимиз борлигидан хурсандман», - деди Чапутова 28 сентябр, чоршанба куни.

Словакия парламенти кўпчилик овоз билан НАТОни кенгайтиришни маъқуллади. Финландиянинг кириши учун ҳозир бўлган 143 депутатдан 126 нафари, Швециянинг кириши учун 144 нафар депутатдан 124 нафари овоз берди.15 нафар парламентарий – асосан ўнг экстремистик қанот вакиллари – ҳар бир жараёнда қарши овоз берди.

Шу тариқа, Словакия НАТОнинг сўнгги аъзоларидан бири сифатида Швеция ва Финландиянинг иттифоққа қўшилиши тўғрисидаги протоколларни ратификация қилди. Уларнинг НАТОга кириши учун барча 30 та иштирокчи давлатнинг розилиги керак. Илгари аризалар АҚШ, Германия, Франция ва НАТОнинг 20 дан ортиқ давлатлари расмийлари томонидан маъқулланган. Финландия президенти август ойида протоколларни ратификация қилиш «кутилганидан ҳам тезроқ» бўлганини тан олди.

Ҳар икки давлат ҳам ўнлаб йиллар давомида ҳарбий иттифоққа кирмаган, бироқ Россия Украинага бостириб кирганидан кейин шундай қарорга келди. Туркиянинг позицияси Финландия ва Швециянинг НАТОга аъзо бўлиши йўлидаги асосий тўсиққа айланди. Бу мамлакат президенти Ражаб Тоййиб Эрдўған Стокҳолм ва Ҳелсинкини Анқара террорчи деб ҳисоблаган курд қуролли гуруҳларини қўллаб-қувватлашда, шунингдек 2019 йил Сурияда курдларга қарши ҳарбий операция бошланганидан сўнг Туркияга мудофаа маҳсулотлари етказиб бериш бўйича санкциялар жорий этишда бир неча бор айблаган.

Июнь ойининг охирида, НАТО саммитида томонлар келишувга эришди ва қўшма меморандумни имзолади, унда Анқара Швеция ва Финландиянинг НАТОга аъзо бўлиш интилишини қўллаб-қувватлашга ваъда берди.