Ўзбекистон Кобулдаги мактабда содир этилган террорчилик хуружини қоралади

Ўзбекистон Ташқи ишлар вазирлиги Афғонистон пойтахтида содир этилган зўравонлик ҳаракатларининг ташкилотчилари ва ижрочиларини аниқлашда барча зарур чораларни кўришга чақирди.

“Кобул ғарбидаги таълим марказида содир этилган қабиҳ террорчилик хуружи оқибатида ўнлаб инсонлар, асосан, қизлар ҳалок бўлгани ва жароҳатлангани ҳақидаги хабарни чуқур қайғу билан қабул қилдик, - деб таъкидланган ТИВ баёнотида. - Яна рўй берган зўравонлик ҳаракатларни кескин қоралаган ҳолда, мазкур ёвуз ва ғайриинсоний хуруж ташкилотчилари ҳамда ижрочиларини аниқлашда барча зарур чораларни кўришга чақирамиз”. 

Баёнотда ҳалок бўлганларнинг оила аъзолари ва яқинларига чуқур ҳамдардлик билдирилиб, жароҳатланганларнинг тезроқ соғайиб кетиши тилаб қолинган.

Афғонистон пойтахтида 30 сентябр, жума куни худкуш-террорчи таълим муассасасига ҳужум уюштирди. Оқибатда камида 19 киши ҳалок бўлди, яна 27 киши яраланди.

Британиянинг BBC медиакомпанияси хабарига кўра, ҳужум объекти қизлар ва ўғил болалар учун биргаликда таълим берувчи Kaj хусусий академияси бўлган. Маҳаллий ОАВ қурбонлар сони ҳақида турлича хабар берди. Aamj News портали қурбонлар ва жароҳатланганларнинг умумий сони 100 кишига етганини, уларнинг аксарияти қизлар эканлигини билдирди. Шу билан бирга, dpa агентлиги тиббиёт муассасалари вакилларига таяниб, 30 га яқин одам ҳалок бўлгани ва 56 киши яраланганини ёзди.

Хабар қилинишича, ҳужум асосан Афғонистон аҳолисининг қарийб 9 фоизини ташкил этувчи ҳазоралар истиқомат қиладиган Кобул туманида содир этилган. Ҳозирча ҳеч бир ташкилот Кобулдаги ҳужум учун жавобгарликни ўз зиммасига олмади.

Афғонистонда ҳокимият тепасида турган толиблар ҳужумни қоралаб, унинг ортида турганларни қўлга олиш ва жазолаш чораларини кўришга ваъда берди.