Red Wings Тошкентдан Ставропол ва Уфага парвозларни йўлга қўяди

4 ноябрдан Red Wings авиакомпанияси Тошкентдан Ставропол ва Уфага тўғридан тўғри рейсларни йўлга қўяди.

Фото: Red Wings

Uzbekistan Airports хабарига кўра, парвозлар мунтазам равишда 100 ўринга мўлжалланган SSJ100 самолётларида амалга оширилади.

Тошкент — Ставропол ва Тошкент — Уфа йўналишлари бўйича парвозлар ҳафтада бир марта, жума кунлари амалга оширилади. Чипталар flyredwings.com расмий веб-сайтида ёки авиакомпаниянинг мобил иловаси орқали сотувга қўйилган.

Red Wings — Россиянинг энг йирик ўнта авиакомпанияларидан бири бўлиб, доимий ва чартер рейсларда йўловчи ташишга ихтисослашган.

Бугунги кунда авиаташувчи Ўзбекистон пойтахтидан Москва, Екатеринбург ва Махачқалъага парвозларни амалга оширмоқда.