Фавқулодда вазиятлар вазири ўринбосари Пахтаобод тумани ҳокимига айланди.
![](https://storage.kun.uz/source/8/fyo2RWRQFo-yUIp6nwneEKQmI4wx0TPB.jpg)
Фавқулодда вазиятлар вазири ўринбосари Азизбек Латифжонов Андижон вилояти Пахтаобод тумани ҳокими лавозимига тайинланди.
![](https://storage.kun.uz/source/8/KRdrp0ok5h6ovYVk_fudAApthpZt8Dqe.jpg)
Азизбек Раҳимович Латифжонов 1977 йилда Андижон вилояти Избоскан туманида туғилган. 1999 йилда Андижон муҳандислик-иқтисодиёт институтини, 2000 йилда Ўзбекистон Республикаси Банк-молия академиясини тамомлаган.
У меҳнат фаолиятини 1994 йилда «Ўзбекистон саноат-қурилиш банки» очиқ акциядорлик тижорат банки Андижон вилояти бўлими пул алмаштириш шохобчаси кассири вазифасидан бошлаган. Турли йилларда банк соҳасида фаолият кўрсатган, 2007 йилдан Молия вазирлиги тизимида ишлай бошлаган.
2007-2011 йилларда Молия вазирлиги Инвестициялар бошқармаси ҳудудий капитал қурилиш дастурларини молиявий тартибга солиш бўлими бошлиғи, 2011-2015 йилларда Ўзбекистон Республикаси Молия вазирлиги инвестициялар бошқармаси бошлиғи ўринбосари–ҳудудий капитал қурилиш дастурларини молиявий тартибга солиш бўлими бошлиғи, 2015-2017 йилларда Ўзбекистон Республикаси Молия вазирлиги инвестициялар бошқармаси бошлиғи вазифасида фаолият кўрсатган.
Азизбек Латифжонов 2017 йил октябрида Ўзбекистон фавқулодда вазиятлар вазирининг моддий-техника ва молия-иқтисодиёт бўйича ўринбосари лавозимига тайинланганди.
Пахтаобод туманига 2022 йил февралидан буён Элёрбек Усмонов раҳбарлик қилиб келаётганди.
У шу йил сентябрида президент администрацияси раҳбари Сардор Умрзоқов раҳбарлигидаги йиғилишда раҳбарлик этикаси қоидаларига риоя этмагани, хизмат ваколатидан четга чиқиб қонунбузилиш ҳолатларига йўл қўйгани учун ишдан олинганди.