25 октябрь куни Қуёш тутилади. Уни Ўзбекистонда ҳам кузатиш мумкин бўлади

Қуёш тутилиши Исландияда бошланиб, Арабистон денгизи ҳудудида тугайди. Қисман тутилишнинг энг катта фазаси (0,863) Россиянинг Ханти-Мансийск автоном округида кузатилади. Унга яқин бўлган энг катта шаҳар — Нижневартовск.  

Қисман тутилиш 89 та мамлакатда кузатилади, шу жумладан, Ўзбекистонда ҳам. 

Тошкент шаҳрида Қуёш тутилиши соат 15:23 да бошланиб, максимал фаза 16:34 да кузатилади. Максимал фаза ўлчами 0,75 га тенг бўлади.   

Мутахассисларга Қуёшнинг қисман тутилишини кузатиш қизиқ эмас. Уларни Қуёшнинг тўлиқ тутилиши кўпроқ қизиқтиради. Чунки унда Қуёш тожини кузатиш имконияти пайдо бўлади. 

Қуёш тутилишини кузатиш учун махсус ҳимоя воситаларидан — қора кўзойнак, қорайтирилган шиша ва шунга ўхшаш нарсалардан фойдаланиш лозим. Қуёшга ҳимоя воситаларисиз қараш кўз саломатлиги учун хавфли ҳисобланади. 

Фото ёки видеотасвирга олиш учун махсус филтрлардан фойдаланиш даркор. 

Қуёш тутилишини томоша қилиш учун телескоп ёки дурбин каби оптик асбоблардан фойдаланиш маслаҳат берилмайди, чунки бунда кўзга жиддий зарар етиши мумкин.