Астронавт коинотдан Ер устидаги улкан спрайтни кўрсатди

NASA астронавти Никол Айерс коинотдан улкан қизил спрайт акс этган Ернинг таъсирли сурати билан ўртоқлашди. Ушбу ноёб атмосфера ҳодисаси 30 йилдан бери ўрганилаётган бўлса-да, олимлар учун ҳамон сир бўлиб қолмоқда.

У расмий равишда TLE (Transient Luminous Event) ёки ёруғликнинг ўтиш ҳодисаси деб аталади. Бу атмосферанинг юқори қисмида момақалдироқ булутларидан 80 километр баландликда пайдо бўладиган ёрқин нурдир. Унинг кўриниши атмосферанинг пастки қатламларида пайдо бўладиган кучли чақмоқ билан боғлиқ.

SpaceX Crew-10 миссияси учувчиси ва Халқаро космик станцияга (ХКС) 72- ва 73-экспедициялар аъзоси Айерс 3 июл куни ушбу ноёб ҳодисани суратга олди.

«Шунчаки зўр, бугун эрталаб Мексика ва Қўшма Штатлар устидан учиб ўтаётганимизда ушбу спрайтни кўрдим», деди у.

Бу ҳодиса баъзан медуза деб аталади, чунки ёруғликнинг кўплаб шохлари пайпаслагичдек тарқалади. Спрайтлар ҳажми ва шакли жиҳатидан фарқ қилади, энг каттаси Ер юзасидан 80 километр баландликда жойлашади. Қизил ранг атмосферанинг юқори қатламларида азот билан ўзаро таъсирга боғлиқ.

Улар биринчи марта 1989 йилда суратга олинган. Шунга ўхшаш «чақнаш» Юпитер атмосферасида ва эҳтимол, Сатурн ва Венерада ҳам содир бўлади.