“Албатта, бу борада жамоатчилик фикри ҳам эътиборга олинади. Боғ олдин аталган номи Ғафур Ғулом номидаги боғ бўлиб қолади”, деди Чилонзор ҳокимининг давлат тили масалаларига масъул маслаҳатчиси Ботир Расулов.
Ғафур Ғулом номидаги маданият ва истироҳат боғи номи ўзгармайди. Бу ҳақда Чилонзор тумани ҳокимлиги матбуот хизмати маълум қилди.
Туман ҳокимининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш бўйича маслаҳатчиси Ботир Расуловнинг айтишича, боғнинг номланишига расман ўзгартириш киритилмаган.
Боғ номини ўзгартириш ҳақида Географик объектларни номлаш ва қайта номлаш масалалари бўйича туман комиссияси номига ариза келиб тушмаган.
“Албатта, бу борада жамоатчилик фикри ҳам эътиборга олинади. Боғ олдин аталган номи Ғафур Ғулом номидаги боғ бўлиб қолади”, – деди ҳоким маслаҳатчиси.
Эслатиб ўтамиз, аввалроқ боғни 49 йилга ижарага олиб, уни реконструкция қилган компания уни Dream Park деб аташга қарор қилгани маълум бўлганди.
Аҳоли ўрганиб қолган номнинг инглизча номга алмашиши жамоатчилик эътирозига сабаб бўлгач, боғ маъмурияти Kun.uz'га изоҳ берганди: Боғ номига “Орзулар боғи” деган сўз қўшилиб, Ғафур Ғулом номидаги Dream Park ёки “Орзулар боғи” деб аталади.
Реконструкция давомида боғ дарвозасидан “Ғафур Ғулом номидаги маданият ва истироҳат боғи” деган ёзув олиб қўйилган. Айни пайтда боғ очилишига тайёргарлик кўрилмоқда.
