ОАВ: G7 давлатлари Россия нефти нархининг чегараси бўйича келишиб олди

«Катта еттилик» давлатлари ва Австралия Россия нефти учун қатъий нарх белгилашга келишиб олди, деб хабар бермоқда Reuters 3 ноябрь, пайшанба куни музокаралар мазмуни билан таниш бўлган, бироқ бу мавзу бўйича оммавий баёнотлар беришга ваколатли бўлмаган манбага таяниб. 

Унинг сўзларига кўра, қатъий нарх ҳали аниқланмаган, бироқ у ноябрь ойида эълон қилинади. Нефть нархлари индекси (сузувчи курс) учун чегирма усулига мурожаат қилмасликка қарор қилинди. Агентлик суҳбатдошининг фикрича, чегирма кўринишидаги нархни исталган индексга боғлаш ҳаддан ташқари ўзгарувчанлик ва нархларнинг потенциал тебранишларига олиб келади. 

Хабар қилинишича, ҳамкорлар керак бўлганда белгиланган нархни мунтазам равишда қайта кўриб чиқмоқчи. G7 бу ёндашув бозор барқарорлигини оширади ва унинг иштирокчиларига юкни минималлаштиради, деб ҳисоблайди. Келишувнинг бошқа тафсилотлари ҳозирча маълум эмас.  

Сўнгги ҳафталарда АҚШ томони ва G7’нинг бошқа аъзолари денгиз транспортига эмбарго қўйиш билан боғлиқ бўлиши керак бўлган Россия нефтига нарх чегарасини белгилаш бўйича мисли кўрилмаган режага оид қизғин музокаралар олиб боришди. Европа Иттифоқининг олтинчи санкцияларига мувофиқ, бу эмбарго 5 декабрдан кучга кириши керак. 

Ушбу чекловлардан мақсад - Украинадаги уруш молиялаштириладиган Россия бюджетига тушумларни камайтиришдир. Ўз навбатида, Россия «нарх чегараси» жорий этилишини қўллаб-қувватловчи мамлакатларга денгиздан нефть етказиб беришни тўхтатишини аллақачон эълон қилган.