Зеленский: Москва билан музокаралар учун эшикни ёпиб қўйганим йўқ

Украина Россия билан музокаралар олиб боришга тайёр, лекин фақат Россия оккупантга айланганини тан оладиган ва ҳақиқатан ҳам тинчликка тайёр бўлган вакили билан. Бу ҳақда Украина президенти Володимир Зеленский Американинг CNN телеканалига берган интервьюсида айтиб ўтди.

Фото: Reuters

Унинг таъкидлашича, ҳозиргача ультиматумлардан ташқари, Россия Федерациясининг амалдаги президентидан ҳеч нарса эшитмаган.

Зеленскийнинг сўзларига кўра, у музокаралар учун эшикни ёпмаган, бироқ Киев фақат тинчликка чиндан тайёр бўлган ва «ҳозирда улар оккупантлар» эканини тан олишга тайёр бўлган шахс билан мулоқотга тайёр.

«Биз ҳамма нарсани қайтаришимиз керак. Ер, ҳуқуқ, эркинлик, пул. Энг муҳими - адолат. Ҳозирча мен Россиядан бундай баёнотларни эшитмадим - на Путиндан, на бошқа ҳеч кимдан», - дея таъкидлади Зеленский.

Аввалроқ Украина президенти Киев фақат Россиянинг навбатдаги раҳбари билан тинчлик музокараларини олиб боришга тайёрлигини такрорлаганди.

Россияни Украина бўйича тинчлик битимини ишлаб чиқиш, жумладан, иқлим ўзгаришига қарши курашиш учун музокаралар столига ўтиришга мажбурлаш керак. Бу ҳақда Украина президенти Володимир Зеленский айтиб ўтди.

«Дунё урушга, энергия ва озиқ-овқат инқирозига, таниш халқаро муносабатларнинг бузилишига қарши курашга қаратилган бўлса, иқлим бўйича кун тартиби аниқ зарар кўради. Иқлимнинг бузилишини қандайдир тарзда тўхтатиб бўлмайди, - деди у. - Шунинг учун иқлим бўйича кун тартибини жиддий позицияда кўраётганлар зудлик билан рус агрессиясини тўхтатиши, ҳудудий яхлитликни тиклаши ва Россияни ҳақиқий тинчлик музокараларига мажбурлаши керак».

11 октябрь куни Украина президенти Володимир Зеленский «катта еттилик» вакиллари билан учрашувда Россия президенти Владимир Путин билан урушни тугатиш бўйича музокаралар олиб бориш ниятида эмаслигини маълум қилди.