Россияда шаҳар мэри урушга кетиш учун истеъфога чиқди

Россиянинг Чита шаҳри менежери Александр Сапожников Украинадаги урушга бориш учун истеъфога чиқди.

У 2019 йилдан бери шаҳар мэри (ҳокими) лавозимида ишлаб келаётган эди ва ўз хоҳиши билан ишдан бўшади.

«Мен бугун энг керакли жойимга - махсус ҳарбий операция зонасига боришга қарор қилдим. Мен жанговар тажрибага эга десантчи ва фуқаро сифатида ота-боболаримиздан мерос бўлиб қолган келажак ҳуқуқи учун Ватанимиз тақдирини ҳал қилаётган жангдан четда қололмайман. Бу менинг бурчим ва Ватанимиз ҳимояси йўлидаги тақдиримдир», деб ёзди Сапожников ижтимоий тармоқда.

Сапожников ўз хоҳиши билан истеъфога чиқиб, урушга отланган биринчи мэр бўлди.

Россияда қисман сафарбарлик бошланганидан сўнг, Давлат Думаси спикери Вячеслав Володин, унинг талабларига жавоб берадиган депутатлар урушга бориши кераклигини айтган эди.

Бироқ, депутатлар бунга рози бўлмади. Масалан, «Единая Россия» партияси аъзоси Дмитрий Вяткин «ортимизда халқ тургани сабабли» депутатлар урушга бора олмаслигини айтди.